སྒྲོལ་མའི་སྒྲུབ་ཐབས།
སྒྲོལ་མའི་སྒྲུབ་ཐབས།
རྒྱ་གར་སྐད་དུ། ཏཱ་ར་སཱ་དྷ་ནཾ། བོད་སྐད་དུ། སྒྲོལ་མའི་སྒྲུབ་ཐབས། ཡི་གེ་ཏཱོཾ་ལས་བྱུང་བའི་ཨུཏྤལ་དབུས་ན་ཡི་གེ་ཏཱོཾ་གནས་པ་བསྒོམས་ལ། དེ་དག་ཡོངས་སུ་གྱུར་པ་ལས་འཕགས་མ་སྒྲོལ་མ་སྐུ་མདོག་སྔོན་མོ་གཡས་ཀྱིས་མཆོག་སྦྱིན་པ། གཡོན་གྱིས་ཨུཏྤལ་བསྣམས་པ། བཟང་པོའི་གདན་ལ་བཞུགས་པ། དོན་ཡོད་གྲུབ་པ་དབུ་རྒྱན་ལ་བཞུགས་པར་བསྒོམས་ཏེ། ཡེ་ཤེས་སེམས་དཔའ་དང་གཅིག་ཏུ་བྱས་པས། ཨོཾ་ཏཱ་རེ་ཏུཏྟཱ་རེ་ཏུ་རེ་ཆེ་གེ་མོ་དབང་དུ་གྱིས་ཤིག་སྭཱ་ཧཱ། ཞེས་བྱ་བ་འདི་བསྒྲུབ་བྱའི་མིང་དང་ལྡན་པར་བཟླས་མ་ཐག་ཏུ་བརྗོད་པའི་གྲངས་ངེས་པར་བཟླས་པར་བྱ་བའོ། །མདའ་ལ་སོགས་པའི་ཕྱག་མཚན་མེད་ན་ཡང་བསྒྲུབ་བྱའི་མགུལ་པ་ཨུཏྤལས་བཅིངས་ལ། རང་གི་ལུས་ཀྱི་འོད་ཟེར་སྤྲོས་པའི་ཚོགས་ཀྱིས་དེའི་ལུས་ཀུན་ནས་ཁྱབ་པར་བྱ་སྟེ། རང་དབང་དུ་གཞག་པར་བྱ་བ་ཡིན་ནོ། །སྒྲོལ་མའི་སྒྲུབ་ཐབས་ཨ་བྷ་ཡ་ལས་ཚུལ་ཁྲིམས་རྒྱལ་མཚན་གྱིས་བསྒྱུར་བའོ།།
སྒྲོལ་མའི་སྒྲུབ་ཐབས།